Učenik Pepa Gvardiole Mikel Arteta je sa Arsenalom nanio jedan od najvećih poraza Mančester sitiju.
Nastavlja se košmarna sezona Pepa Gvardiole i Mančester sitija. Sada ih je u velikom derbiju na svom terenu savladao Arsenal5:1 (1:0) iako u većem dijelu meča nije djelovalo da će sastav šampiona Engleske biti ovako ponižen.
Prvi gol je pao na samom startu meča kada je ogromnu grešku napravio Akanđi, a to je iskoristio Haverc. Oteo je loptu, asistirao Edegoru koji je pogodio za 1:0. Do poluvremena nije više bilo golova, a onda je Savinjo na startu drugog dijela dodao Halandu, koji je iznednačio za 1:1. Na 1:1 u 55. minutu djelovalo je da nas čeka derbi, a onda je uslijedio potop.
Samo minut kasnije Tomas Parti je šutirao sa 25 metara i pogodio za 2:1, a onda je u 62. bilo 3:1 kada je Luis Skeli dao gol. Kada je u 76. minutu poslije kontre Martinelija Haverc pogodio sve je bilo gotovo, a za poniženje se pobrinuo mladi Envaneri koji je dao gol za 5:1.