Nije mogao bez porodice
Poslije 16 mjeseci na mjestu trenera, Tjeri Anri odlučio je da napusti Montreal!
Proslavljeni francuski reprezentativac je na klupu člana MLS-a stigao u novembru 2019. godine, a do danas je ekipom komandovao na 29 utakmica, te uknjižio devet pobjeda, četiri remija i 16 poraza.
Razlozi napuštanja Kanade su, ističe Anri – porodične prirode.
"Teška srca sam donio ovu odluku. Prethodna godina je za mene bila izuzetno teška, kad govorimo o privatnom planu. Zbog pandemije korona virusa, nisam bio u prilici da se vidim sa djecom, a tako će biti i u narednim mjesecima, zbog brojnih mjera i restrikcija. Biti toliko odvojen od vlastite djece ipak je preteško za mene", istakao je Anri, koji će se nakon epizode u Montrealu bar za sada vratiti u London.
Kao idealno mjesto gdje bi mogao da nastavi trenersku karijeru njegov bivši trener iz Arsenala Arsen Venger je predlagao Bornmut.
Na tom mjestu se, kao prelazno rješenje do kraja sezone, nalazi bivši engleski reprezentativac Džonatan Vudgejt.
Inače, prije dolaska u Montreal, Anri je od oktobra 2018. do januara 2019. godine predvodio Monako, klub sa kojim je kao igrač postao šampion Francuske u sezoni 1996-97.