Edinson Kavani nije mogao da zadrži emocije poslije eliminacije
Urugvaj je eliminisan sa Svjetskog prvenstva. Ni pobeda protiv Gane (2:0) nije bila dovoljna za prolaz. Razlog za to je iznenađenje koje je Južna Koreja napravila trijumfom protiv Portugala (2:1), pa je tako azijski tim nastavio takmičenje. Imaće Južnoamerikanci za čim da žale pošto bi prošli dalje da su dali bar još jedan gol.
Zato su igrači bili bijesni na sudiju Danijela Siberta (Njemačka), jurili su ga poslije meča, prijetili su mu. Išli su za njim u tunel, obezbjeđenje je moralo da reaguje, ali tu nije bio kraj. Još jedan igrač je izgubio živce - Edinson Kavani (35). Bio je bijesan zbog toga što Urugvajcima nije dosuđen jedan od dva penala kada su se žalili, pa je na putu ka svlačionici gurnuo i razbio VAR monitor.
Bilo je ovo posljednje Svjetsko prvenstvo i za Kavanija i za njegovog sunarodnika Luisa Suareza. Obojica imaju po 35 godina i jasno je da ih nećemo gledati 2026. godine na narednom Mundijalu. Obojica su emotivno reagovali na sve to, Kavani je lomio monitore, dok je Suarez plakao na klupi.