Još jednom će se publika sjetiti najlepšeg dvokoraka jugoslovenske košarke, na meču Partizana i Budućnosti odaće se počast Harisu Brkiću.
Na današnji dan prije 24 godine preminuo je veliki Haris Brkić, a upravo dva njegova bivša kluba odigraće meč 15. decembra 2024. godine. Od 20 časova na programu je meč 12. kola ABA lige između Partizana i Budućnosti, a crno-bijeli su najavili da će u poluvremenu odati počast svom bivšem košarkašu.
Haris Brkić je upucan na parkingu ispred "Pionira" 12. decembra 2000. godine, a tri dana kasnije je preminuo. On se vraćao sa treninga Partizana, a dvojica napadača su ga ubila. Do danas nije rasvijetljeno njegovo ubistvo.
"Prije tačno 24 godine, prestalo je da kuca srce čovjeka koji je svojim igračkim i ljudskim kvalitetima ostavio dubok trag na svoje savremenike, i otišao u legendu o kojoj pričaju nove generacije... Kao i svaki 15. decembar do sada već dvadeset i četiri godine, svanuo je sa jednom mišlju svih članova crno-bijele porodice! Na današnji dan, 2000. godine je otišao naš Haris Brkić! Čovjek koji je svojim igračkim i ljudskim kvalitetima ostavio dubok trag na svoje savremenike i otišao u legendu o kojoj će pričati generacije koje dolaze. Nekadašnji kapiten crno-bijelih i bivši igrač Budućnosti iz Podgorice, sarajevske Bosne i Borca iz Čačka.
Kobnog dvanaestog decembra, Haris je ranije izašao sa treninga i prišao svom automobilu, tamo ga je sačekao nepoznati napadač koji je pucao u dvadesetšestogodišnjeg košarkaša, nanijevši mu rane od kojih je preminuo tri dana kasnije. Dvadeset i četiri godine kasnije, legenda o igraču koji je imao najbolji dvokorak, kapitenu i prijatelju, živi i živjeće vječno. Uspomenu na Harisa čuvaju njegovi prijatelji, navijači i njegovi klubovi! Upravo danas, 24 godine kasnije, na terenu Beogradske arene će od 20 časova igrati Harisovi klubovi, Budućnost iz Podgorice i Partizan.
Pauza između prve i druge četvrtine, biće posvećena nikada zaboravljenom Harisu Brkiću! Sa svega 26 godina, Haris Brkić je odigrao ukupno 294 zvanične utakmice i postigao je 3740 koševa za Partizan. Od povratka u crno-bijeli dres, Haris je odigrao još samo tri zvanične utakmice prije nego što nas je zauvijek napustio.
Prve košarkaške korake, Brkić je napravio u sarajevskoj Bosni sa deset godina. U Partizan je došao 1992. godine. Nakon pozajmice čačanskom Borcu, od sezone 1993/1994 nastupao je za prvi tim crno-bijelih. Narednih sezona sa velikim uspjehom igrao je za tim iz Humske, sa kojim je osvojio tri titule prvaka države i tri nacionalna Kupa. U sezoni 1997/1998, sa Partizanom je nastupao na Fajnal foru Evrolige u Barseloni. Sa mladom reprezentacijom SR Jugoslavije osvojio je bronzanu medalju na Evropskom prvenstvu u Turskoj 1996. godine, a bio je i povremeni član seniorskog državnog tima. U sezoni 1999/2000 igrao je u podgoričkoj Budućnosti, sa kojom je osvojio još jednu titulu prvaka Jugoslavije. Krajem 2000. godine, ponovo se vratio u Partizan", navodi se u tekstu na sajtu KK Partizan.