Poslije dramatičnih polufinala rukometne Lige Evrope u finale idu Monpelje i Flensburg.
Kakva smo polufinala Lige Evrope gledali. Jedno je otišlo u produžetke, a drugo je riješeno golom sa deset metara u posljednjoj sekundi, pa u finale idu Flensburg i Monpelje.
Fantastični Egipćanin Ahmed Hešam je skok šutem preko ruku cijele odbrane Kila pogodio uz zvuk sirene za 32:31 i tako odveo Monpelje u borbu za pehar. Ovo je bio sedmi gol sjajnog beka, a pogodak sa 10 metara će se pamtiti. Uživajte:
Hešam je dao sedam golova, a Šveđanin Karlson je sa krila dao doprinos sa osam pogodaka i bio je najefikasniji. Pet golova je dao Fernandez, 4 Valentan Port, 3 legendarni Dijego Simonet, a heroj iz senke je Šarl Bolzinger.
Iskusni čuvar mreže, godinama osporavan u Francuskoj prvo je na nedavno održanom Svjetskom prvenstvu svojom čudesnom odbranom uspio da donese bronzu "galskim pijetlovima", a sada je ušao sa klupe umjesto Remija Debonea i upisao je 11 odbrana samo u drugom poluvremenu. Kod poraženog tima Zerbe je dao sedam golova, Johanson je dao takođe sedam, Madsen pet, a Skipagotu i budući penzioneri Duvnjak i Vinček po tri.
Igralo se 65 minuta, prošli Burić i Blagotinšek
Prvo polufinale otišlo je u produžetke i na kraju je do pobjede došao Flensburg koji je savladao Meslungen 35:34. Poslije sat vremena rukometa bilo je 28:28, a nakon produžetka u finale je ušla ekipa koja je uspjela da povede golom Kirkelokea, a onda je visoki Blaž Blagotinšek isjekao ključni pas i donio trijumf.
Benjamin Burić je na golu bio bitan faktor pobjede, dok je u napadu sa 9 golova dominirao Jakobsen. Sjajni Danac Kirkeloke je dao 6, pet je imao Džim Gotfridson, a 4 Meler. Kod poražene ekipe Kastening je dao 8 golova, 7 je imao Krištopans, 6 Jonson i Balensijaga, a David Mandić 3.