Dejan Radonjić će u narednim danima i zvanično postati trener Bahčešehira.
Sve je spremno da Dejan Radonjić i zvanično ode u Istanbul! Bahčešehir je zvanično otpustio dosadašnjeg šefa struke Sinana Altaja i sada je samo pitanje dana kada će se ozvaničiti saradnja sa najuspješnijim trenerom Crvene zvezde u istoriji.
Crnogorski stručnjak je bez angažmana od februara ove godine kada je dobio otkaz u Panatinaikosu. Prije toga je vodio Budućnost, Crvenu zvezdu i Bajern Minhen, a sada će se vratiti na scenu kao prvi trener Bahčešehira. Tu ga čeka sastav sa iskusnim kanadskim bekom Filipom Skrabom, nekadašnjim krilnim igračem Limoža, Bilbaa, Unikahe i Turk Telekoma Akselom Buteljom, bivšim košarkašem Fenera, Efesa, Bešiktaša i brojnih turskih klubova Džanom Maksimom Mutafom, kao i sa Tajlerom Kavanom, krinim centrom sa evroligaškim i NBA iskustvom.
Ovaj istanbulski klub je zapravo dio Bahčešehir koledža, a prvi put je 2018. zaigrao u prvoj ligi. Već naredne sezone je nastupao u FIBA kupu Evrope, koji su osvojili 2022. godine. Neki od poznatih igrača koji su nastupali za Bahčešehir su Jaka Blažič, Kino Kolom, Lengston Hol, Ismet Akpinar, Emir Preldžiž, Tarik Blek i Sem Deker.