Kako je najbolje jesti bijeli luk, da li je istina ili mit da ne prija ljudima s niskim pritiskom, i koja su dva najbolja načina pripreme, otkriva nutricionistkinja Branka Mirković.
Nutricionistkinja Branka Mirković pričala je u Jutarnjem programu o tome kako je najbolje pripremiti bijeli luk, a da zadrži zdrava svojstva koja ga čine jednom od najdjelotvornijih namirnica za imunitet. Nutricionistkinja je dala i nekoliko recepata, a objasnila je i šta da uradite ako imate visok pritisak ili vas muči stomak kada jedete bijeli luk. Rješenja su jednostavna! Najprije, rekla je Mirkovićeva, nemojte nikako bacati ljuske luka, bio on bijeli ili crni!
"Ne bacajte ljuske, one imaju vrijednost za respiratorne organe i ugruške. Ako želite bijeli luk da stavite u neko jelo ili supu, zgnječite ga sa sve ljuskom i ubacite ga. Ili cijeli luk sa korom ispecite u rerni, istisnite ga kao pastu, to je sve hranljivo", rekla je ona. Tako pripremljen bijeli luk svako možete da jede, neće smetati želucu - pogledajte kako se bijeli luk peče u rerni!
"Ovo se odnosi i na crni, i na bijeli luk. Crni uzmite neoljušten, izbockajte ga viljuškom i skuvajte u supi, dobićete supu od lukovine. Odličan je za imunitet, i to ne da jedete bijeli luk kao čen, nego sjeckajte i dodajte u hranu. Cijela Francuska i Italija mirišu na bijeli luk, nikome to ne smeta. Obično ljudi narendaju bijeli luk u ulje, pa malo limuna i onda to koriste na kašičicu, ali bolje je unositi ga uz hranu".
Kako je najbolje jesti bijeli luk, da li je sirovi zdraviji, smeta li mu termička obrada i da li zbog nje gubi zdrava svojstva?
"Ne, on neće izgubiti svojstva, ali mnogim ljudima smeta bijeli luk kada je svjež. Ovako obrađen može svako da ga jede. U našoj kuhinji postoje pečene paprike i druge salate, dodajte ga u hranu slobodno", rekla je ona.
Ko ne bi smio da jede bijeli luk, često slušamo o tome da ne smijemo da ga konzumiramo ako imamo nizak pritisak ili probleme s varenjem?
"Ne, zašto ne bi smjeli? Ako vas muči pritisak, posolite ga malo, popijte vodu i pritisak će se podići. Kod varenja smeta samo zeleni dio koji se nalazi u srcu čena, zasjecite ga i izvadite to zeleno perce, onda može svako da ga jede", rekla je ona.
Pire od bijelog luka je vrlo zdrav, cijeli luk ispecite u rerni i onda ga istisnite, kao što smo vam već pokazali u videu. Ali postoji i drugi način, Francuzi tako rade, potope ga u ulje i kuvaju ga na 60-70 stepeni i onda se od njega napravi pasta. Čim osjetite da je mekan kao pire, gotov je, pa ga držite u frižideru. Pogledajte francuski način pripreme, sprema se u šerpi ali može i na ringlu, i u rernu!
Adenozin iz bijelog luka odličan je za krvne sudove, sumpor umanjuje holesterol, a postoji i stari recept sa bijelim lukom koji su naše bake koristile za "usporavanje" starenja. U med se stave bijeli luk i limunov sok, a postoji i verzija s mašću.
"To je stari, stari recept! Isproban i djeluje. Naše bake su tako njegovale kožu, imate i onu priču da može u svinjsku mast da se stavi bijeli luk i da se maže lice time. Iscjedite ekstrakt luka u mast, može i da se jede i da se maže", rekla je ona.
(MONDO)