Posljednju utakmicu u Grupi B, protiv Srbije, Francuzi dočekuju sa maksimalnim učinkom od četiri pobjede na EP u Litvaniji.
Posljednju utakmicu u Grupi B, protiv Srbije, u ponedeljak od 20 časova, Francuzi dočekuju sa maksimalnim učinkom od četiri pobjede na EP u Litvaniji.
Do posljednje u nizu stigli su poslije izuzetno napete i "prljave" utakmice sa reprezentacijom Italije.
Tek u posljednjoj četvrtini, Francuska je našla put do pobjede - 91:84 (20:23, 21:25, 19:19, 31:17)!
Porazima od Srbije i Njemačke i svega jednom pobjedom nad Letonijom, Italijani su sveli svoje šanse za plasman u drugi krug u domen teorije, pa su, za njih odlučujuću, utakmicu sa komšijama počeli "nabrijani", motivisani i bodreni od strane nekoliko stotina bučnih navijača.
Briljirala je NBA trojka Barnjani (17 poena u prvom poluvremenu), Belineli (15, 4/5 za tri) i Galinari. Serijom 15:6, Italija je završila prvo poluvrijeme i dovela favorizovanu Francusku da na pauzi smisli način kako da nadoknadi sedam poena minusa.
U prvom poluvremenu, Italija je šutirala 7/16 za tri poena, a Francuska 0/5, pa je "minus 7" bio sjajan rezultat za pijetlove, koji su ostali bez najboljeg igrača Tonija Parkera. On je u 19. minutu malo duže držao Mordentea pri ulazu, da ne bi bio koš i faul, Italijan se na kraju otrgao i "zveknuo" Parkera po zubima, u tom "čupanju" ruke.
Poslije svega, Parker je morao da izađe iz igre, a bilo je vidljivo i prije toga da Francuzi neće moći da se oslone na njega, kao u prve tri utakmice jer je iz igre šutirao 3/9 (šest poena).
Treću četvrtinu, Francuzi su krenuli sa najjačom petorkom: Parker, Batum, Želabal, Dijav i Noa, na kratko su prišli Italijanima na dva poena zaostatka (52:50, 54:52), ali je trojkaš Galinari vratio svoj tim na odstojanje koje je važilo na kraju prvog poluvremena. Treća četvrtina završena je rezultatom 19:19, tako da su Francuzi imali deset minuta da nadoknade sedam razlike.
Uspjeli su u tome uvođenjem niske i brze postave u igru.
Trojkama Sikambua i Želabala, Francuzi su 60:67 pretvorili u 66:67, Italija je potom ponovo stekla kakvu-takvu prednost (74:70), na šta su Francuzi odgovorili serijom 7:0, pa je pet i po minuta prije kraja na semaforu pisalo 74:77.
Galinari je opet imao odgovor na nalet protivnika i vratio je svojoj reprezentaciji prednost. Italija je dva minuta i 23 sekunde prije kraja imala prednost od 81:79 i tu je stala!
Do kraja utakmice, Batum je postigao sva četiri pogotka sa linije penala, baš kao i Dijav, koji je dodao i šesti poen iz igre. Sa osam od osam sa linije slobodnih bacanja kada je to bilo najbitnije, Francuska je uplovila u mirnu luku i 16 sekundi prije kraja stigla do nedostižnih 89:82.
U to vrijeme, na drugom obruču Barnjani i Belineli pokušali su da postignu neke "divlje" poene, dok se Francuska oslanjala na Dijava, koji je pravio smiješnim Manćinelija... Poslije svega, Francuzi osiguravaju plasman u drugu fazu, Italijani ispadaju sa turnira.
Pročitajte ostale rezultate i kompletne tabele u sve četiri grupe.
(MONDO)