Od kada su se upoznali, Mauro i Vanda su problem koji čeka da se dogodi. Znali su to i u Interu, ali malo ko je pomišljao da će Argentinac okrenuti leđa i porodici, sestri Ivani...
Od dana kada su se upoznali, Mario i Vanda su problem koji čeka da se dogodi.
Iako, uglavnom, u tom problemu najdeblji kraj izvuče on.
Mogli su to da pretpostave i u Interu, ali su odlučili da stvari rješavaju preventivno, pa su na ljeto 2015. tada još 22-godišnjem Mauru Ikardiju - igraču na "ratnoj nozi" sa najokorjelijim Interistima - dodijelili kapitensku traku i ugovor sa ubjedljivo najjačom platom u klubu.
Mir je potrajao dobre tri i po godine, ali su se stvari pogoršale kada je ubojiti strijelac odlučio da brigu o karijeri prepusti Vandi Nari, svojoj dragoj i nekada vjenčanoj supruzi bivšeg prijatelja i saigrača, Maksija Lopeza.
Zbog toga što je plavokosom kolegi oteo plavokosu nevjestu, Ikardi je godinama bio u nemilosti najboljih argentinskih fudbalera (pa i selektora, naročito Dijega Maradone), pa se na prste jedne ruke mogu nabrojati njegovi nastupi za "gaučose" do ljetošnjeg privremenog povlačenja Lionela Mesija nakon neuspjeha u Rusiji.
Ove zime uspio je da da zahladni odnose i sa trenerom i saigračima u Interu, zbog čega mu je Lućano Spaleti oduzeo kapitensku traku i, navodno, udaljio ga iz prve postave pred utakmicu šesnaestine finala Lige Evrope sa bečkim Rapidom.
Međutim, kada je ove srijede uveče izašao pred medije, Spaleti je otkrio da dojučerašnji kapiten nije odstranjen iz tima, već da mu je samo oduzeta traka, a da se on samovoljno nije pojavio na treningu pred meč i da je tako grubo prekršio disciplinu i profesionalni ugovor sa "nerazurima".
Pretpostavljamo da je Argentinac to i želio i uradio na nagovor svog agenta, Vande Nare, ali - ako ništa drugo - za ovaj bojkot saigrača kojima je tri i po godine bio kapiten nema podršku u najužem krugu porodice.
Štaviše…
U "sapunici" koja je uznemirila crno-plavi dio Milana jednu od glavnih uloga uzela je i Maurova rođena sestra, Ivana, koja je do brata pokušala da dođe preko Twittera - što donekle govori i o tome ko u ovom trenutku ima punu kontrolu nad karijerom jednog od najopasnijih napadača današnjice.
"Siroti moj brate, zašto dozvoljavaš da ti se ovo događa? Znaš da Inter ne dozvoljava takav stav. Da imaš ozbiljnu osobu uz sebe, nekoga kome je zaista stalo, ovakve stvari ti se ne bi događale", napisala je Ivana Ikardi i prilično jasno opisala situaciju, iako nije navela nijedno ime.
Ikardi je ove zime upao u krizu forme (ili sam do toga doveo?), što se poklopilo sa serijom očajnih rezultata Intera koji su umalo koštali Spaletija posla, međutim kada je novi sportski direktor "nerazura" Bepe Marota istupio javno, pružio punu podršku treneru i poručio da klub neće mijenjati šefa, navijači kao da su dobili signal da problem postoji na drugom mjestu.
I ne samo oni.
Od tog dana sve je vodilo ka neprijatnom, neprofesionalnom i nedostojnom rastanku velikog kluba i jednog od njegovih "najpaženijih" sinova.
Ikardi je "pohađao" Barseloninu čuvenu akademiju "La Masiju", gdje je i upoznao Maksija i Vandu, a kada se 2011. preselio u Đenovu i postao "tinejdž" senzacija Sampdorije, pročule su se i glasine o "krađi mlade" o kojima je Argentina "brujala" mjesecima. Talentovani centarfor doveden je na "Đuzepe Meacu" 2013. godine sa 11 pogodaka u 33 nastupa za klub sa "Marasija" i brzo nagovijestio kakav će centarfor postati - u prvoj sezoni postigao je devet, u drugoj već 22 gola, a do danas bio je strijelac 122 puta na 210 nastupa u crno-plavom dresu.
Da li će ga opet obući?
Ugovor mu ističe 2021. godine, minimalna otkupna cijena od 110 miliona evra za klubove iz inostranstva istekla je prošlog ljeta, pa tako vlasnici Intera sada moraju da pregovaraju sa zainteresovanim stranama o visini transfera, a jedan od osnovnih uzroka njegovog nezadovoljstva je godišnja plata od 5,5 miliona evra.