Nekadašnji kapiten Rusije i Zenita Artjom Dzjuba je izgleda konačno našao novi klub.
Kao prava transfer bomba dočekana je vijest da Crvena zvezda želi da dovede kapitena Zenita Artjoma Dzjubu, koji se spremao za rastanak sa klubom u kom je postao legenda. Ipak poslije mnogo spekulacija to se nije desilo, a Dzjuba do sada nije našao novi tim.
Ipak ruski "Čempionat" javlja da je konačno sve riješeno i da ćemo u Turskoj u dresu Adane gledati Dzjubu i Marija Balotelija kako zajedno igraju u napadu!
Adana će tako iskoristiti to što je Dzjubi istekao ugovor i dovešće ga bez obeštećenja, a on će biti jedna od niza zvijezda koje su skupili u ekipi.
Klub koji je do skora igrao drugu ligu u svojim redovima osim Dzjube i Balotelija ima reprezentativca Ukrajine Jaroslava Rakitskog, nekadašnjeg fudbalera Aston Vile i Sampdorije Birkira Bjarnasona, snažnog napadača koga znamo iz Premijer lige Brita Asombalongu, Marokanca Junesa Belhandu kao i bivšeg vezistu PSŽ-a Bendžamana Stambulija.
Dzjuba dolazi nakon što je na 249 mečeva za Zenit dao 109 golova, ali neosporno je da je u posljednjoj sezoni već pao u drugi plan u Sankt Petersburgu.