Čuvena francuska glumica, koja ove godine puni 80 godina, nedavno je postala prababa. Ipak, Brižit ne vjeruje u krvno srodstvo.
Brižit Bardo ima sina jedinca Nikolu, rođenog 1960. godine s kojim nije u dobrim odnosima. Nikada nije krila da nije željela da postane majka i da je tu ulogu imao njen tadašnji suprug i Nikolin otac, glumac Žak Šarnije.
Nikola Šarnije godinama živi u Norveškoj i ima dvije ćerke Ana-Kamilu i Tea-Žozefinu, koje su samo jednom vidjele svoju poznatu baku.
Brižit Bardo nije bila pozvana ni na Nikolino vjenčanje s norveškom manekenkom An-Lin Bjerkan.
"Nikola je nedavno telefonom zvao majku i saopštio joj da je postala prababa", rekao je glumičin agent Iv Bigo, ali nije precizirao koja je od dvije unuke rodila dijete, niti pol bebe.
"Nikada nisam bila dobra baka. One žive u Norveškoj sa ocem. Ne znaju francuski i nemamo prilike da se viđamo. Znate da uvijek kažem ono što mislim, i mislim ono što kažem. Nisam nikad vjerovala u krvno srodstvo", rekla je Brižit Bardo.
Glumica je sarađivala sa čuvenim rediteljima poput Federika Felinija, Luja Mala, Žan-Lika Godara, kao i Rožea Vadima s kojim je jedno vrijeme bila u braku.
Njeni najpoznatiji filmovi su "Parižanka", "I Bog stvori ženu" , "Don Žuan je bio žena" Rožea Vadima, "Privatni život" i "Viva Marija!" Luja Mala i "Prezir" Žan-Lika Godara.
(Beta, Foto: YouTube screenshot)