Škotska pjevačka senzacija Suzan Bojl popela se pravo na prvo mjesto Bilbordove liste najprodavanijih albuma u SAD
Njen debi album prodat prošle sedmice u 701.000 primjeraka.
Album "I Dreamed A Dream" 48-godišnje učesnice takmičenja "Britanija ima talenat", postigao je najbolji rezultat 2009. u SAD kada je riječ o prvoj nedjelji prodaje.
Suzan Bojl je svojim studijskim ostvarenjem bolja i od Eminema, čiji je novi album "Relapse" prodat u 608.000 primjeraka u prvih nedjelju dana od puštanja u prodaju. "Relapse" je izdat u maju.
"I Dreamed A Dream" bilježi najbolji uspjeh od oktobra 2008. kada je album "Black Ice" grupe "AC/DC" za nedjelju dana prodat u 784.000 primjeraka, piše na sajtu časopisa Bilbord.
Suzan Bojl zauzima drugo mjesto na listi izvođača sa najuspješnijom početnom prodajom albuma prvenca. Prvo mjesto i dalje pripada Snup Dogu čiji je debi album "Doggystyle" iz 1993. prodat u 803.000 primjeraka za prvih nedjelju dana. (Beta)