Ukrajinski predsjednik Viktor Janukovič pokušao je avionom da otputuje u Rusiju. Regionalni guverner i gradonačelnik Harkova pobjegli.
U toj nameri spriječila ga je granična policija, izjavio je danas predsjednik Ukrajinskog parlamenta Oleksaner Turčinov.
"On je pokušao da se ukrca na avion na letu za Rusiju, ali ga je spriječila granična policija. On se trenutno krije negdje u oblasti Donjecka", proruskom gradu na istoku Ukrajine odakle je porijeklom, rekao je Turčinov, kako prenosi agencija Interfaks. Istovremeno, ukrajinska granična služba saopštila je da su regionalni guverner i gradonačelnik Harkova pobjegli iz zemlje za Rusiju.
Guverner Mihajlo Dobkin i gradonačelnik Harkova Genadij Kernes napustili su danas Ukrajinu preko obližnje granice sa Rusijom, rekao je portparol granične službe Oleg Slobodian.
Oba zvaničnika bliski su saradnici Viktora Janukoviča.
Poslanici ukrajinskog parlamenta glasali su ranije danas za smjenu predsjednika Viktora Janukoviča i za održavanje prijevremenih predsjedničkih izbora 25. maja.
Janukovič je prethodno rekao da su sve odluke Verhovne rade nelegalne.
(MONDO, Foto: Beta/AP Photo/Ivan Sekretarev)