Šef Ukrajinske službe bezbjednosti Valentin Nalivaičenko zatražio je danas od Rusije da Ukrajini izruči Viktora Janukoviča, javio je Itar Tass.
Nalivaičenko je na konferenciji za novinare održanoj u Kijevu izjavio da je zatražio od ruskih kolega da obnove saradnju "posebno u vezi sa hitnim izručenjem Ukrajini njenog bivšeg predsjednika Viktora Janukoviča".
Predsjednik Rusije Vladimir Putin ranije danas je izjavio da je ukrajinski parlament legitiman, ali da vršilac dužnosti šefa države nije i da je jedini legitimni predsjednik i dalje Janukovič, mada on "nema političku budućnost".
Viktor Janukovič je, prema njegovim riječima, ispunio sve uslove sporazuma potpisanog 21. februara s predstavnicima opozicije i bukvalno predao svu vlast i pristao na sve zahtjeve opozicije, uključujući vanredne izbore i povratak na ustav iz 2004. godine.
Putin je, komentarišući izvještaje o tome da je Janukovič navodno preminuo od srčanog udara, kazao da je prije dva dana razgovarao sa njim i da je opozvani ukrajinski lider "živ i zdrav".
On je rekao i da Moskva neće priznati rezultate izbora u Ukrajini ako se glasanje bude odvijalo u sadašnjoj atmosferi "terora" i ocijenio da je promjena režima vjerovatno bila nužna, ali da mora biti sprovedena u skladu sa ustavom.
(MONDO, Foto: Beta/AP/Andrei Mosienko)