Pripadnici brazilske mornarice u nedjelju su pronašli još tri tijela putnika stradalih padom Er Fransovog aviona.
Blizu mjesta u Antlantiku gdje se prije nedjelju dana srušio avion Er Fransa, pronađena su još tri tijela, čime je broj pronađenih tijela ljudi iz aviona popeo na pet, saopštila je brazilska vojska. Istražitelji sumnjaju da je kvar na mjeračima brzine uzrok pada aviona.
Vlasti su navele da su piloti aviona koji pretražuju vode srednjeg Atlantika takođe primijetili neodređeni broj tijela i poslali brodove da ih izvade iz vode, rekao je kapetan brazilske mornarice.
Vjeruje se da su mrtvi svih 228 putnika i članova posade koji su bili na letu Er Fransa između Rio de Ženeira i Pariza.
Ni kod jednog od izvađenih tijela nisu pronađeni dokumenti na osnovu kojih bi mogao biti ustanovljen identitet nastradalih.
Tijela su pronađena na oko 70 kilometara od mesta odakle je avion Er Fransa poslao više poruka o nizu električnih kvarova i gubitku pritiska u kabini.
Brazilske vlasti su objavile da su spasilački timovi uočili dva avionska sjedišta i druge ostatke s logom Er Fransa.
Dijelovi su pronađeni samo nekoliko sati nakon što su nađena tijela dva muškarca, torba sa računarom i jedno sjedište iz nestalog aviona.
Er Frans je u međuvremenu objavio da će ubrzati zamjenu mjerača brzine na avionima Erbasa, pošto su se juče pojavile informacije o njihovoj neispravnosti.
Postoje spekulacije da su podaci na starim senzorima možda uzrokovali pad aviona u kojem je bilo 228 putnika i članova posade.
Istražitelji kažu da su senzori u avionu Erbas A330 davali "nedosljedne podatke“ nekoliko minuta prije nego je avion nestao, objavio je Bi-Bi-Si (BBC).
Er Franse je objavio da je još u maju 2008. počeo da primjećuje "incidente gubitka podataka o brzini tokom letova“ na A330 i A340, iako se radilo o malom broju takvih incidenata.
Rojters piše kako su avioni Erbasa zabilježili probleme s mjeračima brzine još 2001. godine, nakon čega se mijenjala oprema.
Er Frans je kontaktirao proizvođača aviona koji je preporučio zamjenu mjerača, ali to nije nužno značilo da avioni nisu pogodni za let.
Ostaci aviona pronađeni su pet dana nakon njegovog nestanka, nedaleko od mjesta sa kojeg je dobijena posljednja poruka iz aviona, prenosi Radio Slobodna Evropa.
Francuska je imenovala izaslanika da pomogne u koordinaciji istrage o padu aviona Er Fransa prošle nedjelje u Atlantski okean.
Zvaničnik francuskog ministarstva spoljnih poslova Pjer-Žan Vandorn biće zadužen i za odnose s porodicama žrtava.
U avionu Er Fransa na letu između Rio de Žanekra i Pariza, koji je nestao 31. maja, nalazilo se ukupno 228 ljudi.
U saopštenju kancelarije premijera Fransoaa Fijona navodi se da će Vandornova misija biti i da "olakša odnose" porodica žrtava s Er Fransom i zvaničnicima vlade.
Saopšteno je i da su francuska fregata i helikopter stigli u dio Atlantskog okeana gdje brazilski stručnjaci traže ostatke aviona. Francuska podmornica trebalo bi da stigne u srijedu da pomogne u potrazi. (MONDO)