U operaciji "Salonika", otkrivena tona kokaina i uhapšene su 22 osobe, saopštio je danas Evropol sa sjedištem u Hagu.
U akciji Španske civilne garde i Evropola, učestvovale su i vlasti Srbije.
Kokain je bio razblažen u 13 tona palminog ulja, a ovaj tovar je u Evropu stigao brodom iz Kolumbije, najprije u luku Antverpen u Belgiji, a zatim kamionima u Albaniju gdje je i zaplijenjen.
Evropol navodi da su pored španskih za uspjeh "Salonike” zaslužne vlasti u još sedam država: Albaniji, Austriji, Belgiji, Njemačkoj, Italiji, Makedoniji i Srbiji.
Policijska istraga koja je dovela do rasturanja ove međunarodne kriminalne mreže Španaca, Marokanaca i Albanaca, za koju se vjeruje da je krijumčarila i prodavala kolumbijski kokain i marokanski hašiš u Evropi, započela je u oktobru prošle godine.
Evropol je naveo da je istragom utvrđeno da je ova kriminalna organizacija imala jasnu hijerarhiju na čijem se čelu nalazio šef koji je koordinirao nekoliko grupa u švercu različitih vrsta narkotika, ali nije naveo identitet uhapšenih.
Isti izvor tvrdi da je pomenuta kriminalna organizacija osnovana prvenstveno zbog šverca velikih količina kolumbijskog kokaina u Evropu, uglavnom preko Antverpena u velikim brodskim tovarima.
Španska civilna garda pratila je članove bande koji su se više puta sastajali u Španiji, ali i njihove tovare „palminog ulja” koji su išli u Albaniju gdje je kokain izdvajan iz smjese.
Među aktivnostima iste kriminalne grupe bio je i šverc hašiša iz Španije u Italiju i Holandiju u kabinama kamiona. U martu ove godine uhapšena su dvojica profesionalnih kamiondžija kod kojih je zaplijenjeno 67, odnosno 99,5 kilograma hašiša.
Čelnici Evropola pozdravili su uspjeh međunarodne policijske akcije i ocijenili da je njome zadat ozbiljan udarac organizovanom kriminalu.
"Sofisticirane metode slanja i transporta droge koje koriste kriminalne mreže, kao i globalna priroda njihovih djelatnosti, ističe važnost efikasne policijske saradnje kroz jedinstvene kapacitete Evropola”, istakao je direktor Evropola Rob Vejnrajt.
(Tanjug)